Í gær var þjóðarátaki í söfnun skjala kvenna hleypt af stokkunum í tilefni 100 ára afmælis kosningaréttar kvenna. Átakið er samstarfsverkefni Landsbókasafns Íslands - Háskólabókasafns, Þjóðskjalasafns Íslands, Borgarskjalasafns og héraðsskjalasafna og hugsað sem hvatning til landsmanna til að afhenda þau á skjalasöfn.

Af því tilefni afhenti Gerður Kristný Guðjónsdóttir rithöfundur teikniblokk sína handritasafni Landsbókasafns til varanlegrar varðveislu ásamt því að Halldóra Kristinsdóttir á handritasafni Landsbókasafns kynnti verkefnið. Þá hélt Njörður Sigurðsson sviðsstjóri í Þjóðskjalasafni stutta tölu um söfnun einkaskjala og hlutverk Þjóðskjalasafns, Svanhildur Bogadóttir borgarskjalavörður sagði frá söfnunarátaki Borgarskjalasafns á skjölum kvenna og Auður Styrkársdóttir forstöðukona Kvennasögusafns sagði frá skjalasafni Ingibjargar H. Bjarnason sem afhent var safninu fyrir stuttu.

Bréf, dagbækur og önnur persónuleg gögn geta veitt innsýn inn í líf einstaklinga og fjölskyldna þeirra en einnig varpa þau ljósi á sögu lands og þjóðar og því merkilegar heimildir. Tekið er við skjölum í handritasafni Landsbókasafns Íslands - Háskólabókasafns, Kvennasögusafni Íslands, Þjóðskjalasafni Íslands, Borgarskjalasafni og héraðsskjalasöfnum og eru starfsmenn safnanna boðnir og búnir að veita ráðsgjöf og aðstoð varðandi frágang og skil á gögnunum.