Þann 3. apríl nk. fagnar starfsfólk Þjóðskjalasafns Íslands 135 ára afmæli safnsins. Stofnun þess miðast við auglýsingu landshöfðingja um starfrækslu landsskjalasafns þann 3. apríl 1882. Í upphafi varðveitti safnið skjöl helstu embætta sem komust fyrir á Dómkirkjuloftinu í Reykjavík. Nú er það til húsa í nokkrum byggingum að Laugavegi 162 og varðveitir um 44.000 hillumetra af pappírsskjölum.

Í tilefni 135 ára afmælisins efnir Þjóðskjalasafn til hátíðardagskrár á afmælisdaginn. Meðal annars mun forseti lýðveldisins Guðni Th. Jóhannesson fá að gjöf afrit teikninga af Bessastöðum. Mennta- og menningarmálaráðherra Kristján Þór Júlíusson fær afhent fyrsta eintak rits um Manntalið 1703 sem kemur út á afmælisdaginn. Útgáfu- og miðlunarverkefni safnsins verða kynnt og valin skjöl til sýnis.

Aðrir viðburðir verða á afmælisárinu. Þar má nefna málþing um hlutverk Þjóðskjalasafns. Þá verður almenningi boðið í heimsókn í safnið á árinu.